नागरिक उन्मुक्ति पार्टीकी अध्यक्ष रञ्जिता श्रेष्ठ सोमबार चीन प्रस्थान गरेकी छन्। प्रधानमन्त्री केपी शर्मा ओलीको औपचारिक चीन भ्रमण टोलीमा परेपछि श्रेष्ठ बेइजिङ गएकी हुन्। तर, बेइजिङ उड्नुअघि उनले आफ्नै पति रेशम चौधरीविरुद्ध कडा अभिव्यक्ति दिइन्। पछिल्लो स्थानीय तह उपनिर्वाचनको मतपरिणामलाई लिएर रञ्जिताले सामाजिक सञ्जालबाटै रेशमलाई प्रहार गरिन्।

पार्टी नेतृत्वका लागि उनीहरूबीच लामो समयदेखि सम्बन्ध चिसिएको छ। टीकापुर महाधिवेशनबाट रेशम चौधरी सर्वसम्मत अध्यक्ष बनेपछि उनीहरू सार्वजनिकरूपमै मिडियाबाजीमा उत्रिएका पनि हुन्। तर, जेल बाहिर निस्किसकेपछि पार्टी संरक्षक रेशम चौधरीले आफ्नो ठूलो मपाई गरेको भन्दै रञ्जिताले कडा टिप्पणी गरेकी हुन्।

उनले भनेकी छन्, ‘म, मेरो , मैले गर्दा, मेरो कारण, मै मात्र, मात्र म, यी सबै म ले गर्दा, मेरो गीतले, मेरो कथा, मेरो व्यथा। आज भौतिक शरीर उपस्थित हुँदा पनि के भयो? कि सबै बेच्नु भको त होइन?,’ रेशमलाई इंगित गर्दै रञ्जिताले भनेकी छन्।

रेशमले ठूलै घमण्ड गरेको उनको बुझाइ छ। ‘आजको दिन हामीले देख्नुपरेको? घमण्ड अलि धेरै भयो कि? आत्मसमीक्षा गर्नुहोस्, अब आफ्नै पोल्टोमा आएका धेरै अवसरहरूलाई बेची खाएको जस्तो होइन चुनाव भनेको,’ रञ्जिताले भनेकी छन्।

पछिल्लो समय रेशम हरेक सभामा आफू जेलमा रहँदा पार्टीलाई जन्माएको, बाबा तोहर छावा जेलम परल बा शीर्षक गीतले चुनाव जितेको, आफूले धेरै राष्ट्रिय गीत गाएको, आफू पत्रकार, कलाकार, साहित्यकार सबै भएको बताउँदै आएका छन्। रेशमको यिनै भाषणलाई लिएर रञ्जिताले कटाक्ष गरेकी हुन्।

त्यसो त रेशमले पनि फेसबुकबाटै रञ्जितालाई जवाफ फर्काएकी छन्। उनले नागरिक उन्मुक्तमात्र होइन, ठूला पार्टीले पनि चुनाव नजितेको उल्लेख गरेका छन्। ‘धेरै ठूला पार्टीले पनि चुनाव जितेका छैनन्। हामीले केहि गुमाएका पनि छैनौं। अहिलेको निर्वाचन क्षेत्रमा गएको निर्वाचनमा हाम्रो उम्मेदवारी समेत थिएन। अहोरात्र मेहनत जारी छ। भिताको एक बल्ड्याङले धुरी चढ्नबाट कमिलालाई कसैले रोक्न सक्दैन। हेर्दै जाउँ,’ उनले भनेका छन्।