केही वर्षअघि नेपालमा रोहिंग्या शरणार्थीको आगमनले ठूलो चर्चा हुने गर्थ्यो। लुकीछिपी सीमा क्षेत्रबाट तराईको बाटो हुँदै रोहिंग्याहरू राजधानी काठमाडौंसम्म आइपुग्ने गर्थे। जसका कारण उनीहरूको चर्चा हुन्थ्यो। तर, पछिल्लो समय यस विषयमा खासै चर्चा भएको पाइँदैन।

त्यसो भए के नेपालबाट रोहिंग्या शरणार्थीहरू पलायन भए? पक्कै होइन। अहिले पनि काठमाडौंसहित देशका विभिन्न स्थानमा रोहिंग्या शरणार्थीहरू लुकिछिपी बस्दै आएका छन्। कतिपय ठाउँमा सरकारकै निगरानीमा बसिरहेका छन् भने कतिपय ठाउँमा नेताहरूसँगको सांठगांठका कारण बस्न पाएका छन्।

मधेस प्रदेशअन्तर्गत सप्तरी जिल्लाको बोडे बरसैन नगरपालिका र काञ्चरुप नगरपालिकामा केही रोहिंग्या परिवार बसोबास गर्दै आएका छन्। जिल्लाका केन्द्रीय नेताहरूको संरक्षणमै उनीहरू त्यहाँ बसोबास गर्दै आएको स्रोतले बताएको छ।

स्रोतका अनुसार रोहिंग्याका पाँच परिवार वडा नं. ५ बोडे बरसाईंको जाजर क्षेत्र र कञ्चररूप नगरपालिकाको बालुवा क्षेत्रमा तीन रोहिंग्या परिवार बस्छन्। उनीहरूलाई एमालेका नेताहरूले सहयोग गर्दै आएको स्रोतको दाबी छ। यी परिवारलाई एमाले नेता अख्तर मियाँ र सुमनराज प्याखुरेलले सहयोग गरिरहेका स्रोतको भनाइ छ।

त्यतिमात्र होइन, नेपाल भ्रमणमा आएका केही रोहिंग्या परिवारलाई एमालेको जिल्ला अध्यक्षसमेत भइसकेका ताराकान्त चौधरीले आश्रय दिएको स्रोतले बतायो। उनीहरूलाई मेयर रामलखन मल्लले डाक्नेश्वरी नगरपालिकामा आश्रय दिएको स्रोतको भनाइ छ। उनीहरूले वरपरका थप रोहिंग्याहरूलाई सुविधा दिने योजना पनि बनाएको बताइएको छ। आफ्नो अनुकूलताका लागि उनीहरूले त्यहाँको हाकिमहरू पनि फेरबदल गर्दै आएको बताइन्छ।