सिकलसेलको उपचारका लागि दाङको राप्ती स्वास्थ्य विज्ञान प्रतिष्ठानले छुट्टै वार्ड स्थापना गरेको छ। थारू समुदायको बाक्लो जनसंख्या रहेको दाङमा उपचार सहजताका लागि सिकलसेलको छुट्टै वार्ड सुरु गरिएको हो।

आइतबारदेखि सेवा सुरु गरिएको अस्पतालमा १० बेड र दिवा उपचारका लागि छुट्टै ५ बेडसहितको वार्ड स्थापना गरिएको प्रतिष्ठानका उपकुलपति विकास लामिछानेले जानकारी दिए। यसअघि प्रतिष्ठानले सिकलसेलका लागि ओपिडी मात्र सञ्चालनमा ल्याएको थियो।

थारू समुदायमा वंशाणुगत समस्याका रूपमा रहेको सिकलसेल उपचारका लागि उनीहरूको बसोबास रहेका प्रमुख क्षेत्रमा बेग्लै वार्डमार्फत उपचार सेवा लागू गर्ने योजनाअनुरूप सेवा सुचारु गरिएको हो।

सिकलसेलको औषधिसमेत निःशुल्क उपलब्ध गराउने गरी तयारी भैरहेको स्वास्थ्य मन्त्रालयले जनाएको छ। यसअघि स्वास्थ्य मन्त्रालयले गत २० गते मन्त्रीस्तरीय निर्णय गर्दै भेरि अस्पताल नेपालगन्जमा बेग्लै वार्ड स्थापना गरेको थियो। स्वास्थ्य मन्त्रालयका अनुसार सिकलसेलबाट समुदायका झन्डै १२ प्रतिशत नागरिक प्रभावित छन्।