स्थानीय तह उपनिर्वाचनका लागि बर्दियाको ठाकुरबाबा नगरपालिका वडा नं ४ को वडाध्यक्षमा ६ दलका उम्मेदवारले उम्मेदवारी दर्ता गराएका छन्। आगामी मंसिर १६ गते हुन गइरहेको स्थानीय तह उपनिर्वाचनमा ठाकुरबाबा नगरपालिकाको ४ नं वडाको वडाध्यक्ष पदको लागि उम्मेदवरी दर्ता भएको हो।

वडाध्यक्ष पदका लागि नेपाली कांग्रेसबाट अमिन थारु, नेकपा एमालेबाट विष्णु प्रसाद देवकोटा, नेकपा माओवादीबाट शेरबहादुर थारुले उम्मेदवार दर्ता गराएका छन्। त्यसैगरी नागरिक उन्मुक्ति पार्टीबाट प्रितिलाल थारु, राष्ट्रिय स्वतन्त्र पार्टीबाट बासुदेव शर्मा र राष्ट्रिय प्रजातन्त्र पार्टीबाट रत्नबहादुर शाहीले उम्मेदवारी दर्ता गराएको सहायक निर्वाचन अधिकृत नगेन्द्र चौलागाईंले बताए।

एक हजार आठ सय ३९ महिला र एक हजार छ सय ७१ गरी तिन हजार पाँच सय १० जना मतदाता रहेका छन्। वडामा दुई ओटा मतदानस्थलमा ५ ओटा मतदान केन्द्रमा निर्वाचन हुनेछ। २०७९ को स्थानीय तह निर्वाचनमा निर्वाचित वडाध्यक्ष जिल्ला समन्वय समितिको प्रमुख भएपछि हालः निर्वाचन हुन लागेको हो।