थारू कल्याणकारिणी सभाको २३औं महाधिवेशन आजदेखि रुपन्देहीको भैरहवास्थित पटवा बैंक्वेटमा सुरू भएको छ। महाधिवेशनमा देशभरिका तीन सय बढी प्रतिनिधिहरू सहभागी भएका छन्। महाधिवेशनमा थारू सांसदहरूको पनि उपस्थिति रहेको छ। उद्‍घाटनसत्रमा बनाइएको मञ्च भने कांग्रेस नेताहरूले भरिएका थिए।

थाकस महाधिवेशनमा सहभागी जनाउन कांग्रेसका नरेन्द्र चौधरी, विजयकुमार गच्छदार, उमाकान्त चौधरी, रामजनम चौधरी, तेजुलाल चौधरी, डा. गोपाल दहित, योगेन्द्र चौधरी, कल्पना चौधर, डिल्ली चौधरीलगायत सहभागी थिए। एमालेबाट भगवती चौधरी, नागरिक उन्मुक्ति पार्टीका रेशम चौधरी र रास्वपाका सांसद अशोककुमार चौधरी पनि मञ्चमा सहभागी थिए।

२३औं महाधिवेशनमा कांग्रेसका पदाधिकारीबीच नै भीडन्त हुने देखिएको छ। हालसम्म कार्यवाहक अध्यक्ष देवी प्रसाद चौधरी, महामन्त्री प्रेमीलाल चौधरी र उपमहामन्त्री मिनराज चौधरीले उम्मेदवारी घोषणा गरेका छन्। कांग्रेसकै नेताहरूबीच भीडन्त हुने देखिएपछि कांग्रेसका शीर्ष नेताहरू पनि महाधिवेशनमा उपस्थित भएका हुन्। शीर्ष तहका नेताहरूले सहमतिमै सभापति चुन्न दबाब दिएको बताइएको छ। यद्यपि उनीहरूले अडान भने छाडेका छैनन्। देवी लुम्बिनी प्रदेशका सांसदसमेत रहेकाले चुनाव हुने अवस्था आए प्रेमीलाल र मिनराजबीच भीडन्त हुनसक्ने स्रोतले बतायो।