भजुमनराम महतोले लेखेको ‘थारू जातिको संक्षिप्त इतिहास र संस्कृति’ पुस्तक सार्वजनिक भएको छ। चितवनका साहित्यकार तथा भरतपुर महानगरपालिका प्रज्ञा प्रतिष्ठानका सदस्य केदारनाथ खनालले शनिबार उक्त पुस्तकको विमोचन गरेका हुन्।

पुस्तकमा थारू जातिको ऐतिहासिक पृष्ठभूमि, बसोबास क्षेत्र, पहिरन र पेसा व्यवसाय, चितवन जिल्लामा थारू जातिको अवस्था, परम्परा, मूल संस्कार, संस्कृति, नाचगान जस्ता विषय समेटिएका छन्।

थारू कल्याणकारिणी सभाको इतिहास, भूमिका र यसले गरेका आन्दोलन र अभियान पनि पुस्तकमा समेटिएको छ। किताब पठनीय रहेको समीक्षक डीआर पोखरेलले बताए। अर्का टिप्पणीकार थारू पत्रकार संघका केन्द्रीय कोषाध्यक्ष कारी महतोले किताबले थारू समुदायका विविध पक्षका बारेमा राम्रो जानकारी दिने बताए।

थारू समुदाय चितवनका आदिवासी हुन्। २०७८ सालको जनगणना अनुसार यहाँको कूल जनसंख्या ७ लाख १९ हजार रहेकामा थारू समुदायको जनसंख्या ७२ हजार ६ सय ५८ रहेको छ। देशभर थारूको जनसंख्या १८ लाख ७ हजार छ। तराईका २२ जिल्लासहित काठमाडौं उपत्यका, मकवानपुर, सिन्धुली र सुर्खेतमा थारू समुदायको बसोबास रहेको पुस्तकमा उल्लेख छ।