नागरिक उन्मुक्ति पार्टी (नाउपा) ले सुदूरपश्चिम वा लुम्बिनी प्रदेशको मुख्यमन्त्री दावी गर्ने भएको छ । नयाँ समीकरणमा जाने वा नजाने भन्ने प्रष्ट निर्णय नगरिसकेको नाउपाले मुख्यमन्त्रीको अडान लिने भएको छ ।

‘हाम्रो सांसदहरुसँग छलफल गरेको छु, साथीहरुको एउटा थारु मुख्यमन्त्री हुनुपर्छ भन्ने सुझाव छ’ अध्यक्ष रेशम चौधरीले भने, ‘त्यो सुदूरपश्चिममा भए पनि हुन्छ, लुम्बिनी भए पनि हुन्छ ।’

गत वर्ष चुनावमा भाग लिइरहँदा नै ‘थारु मुख्यमन्त्री’ एजेण्डा बनाएको उनले बताए । ‘पहिचान सहितको संघीयता, राजबन्दीहरुको रिहाइ र थारु मुख्यमन्त्री भनेर हामी चुनावमा भाग लिएका थियौ’, चौधरीले भने ।

नाउपाले नयाँ सरकारमा जाने वा नजाने भन्ने निर्णय लिने अधिकार अध्यक्ष चौधरीलाई नै दिएको छ । सरकारबारे निर्णय गर्नुपर्ने भएकाले पार्टी बैठक भने स्थगित गरेको छ ।

यही फागुन २७–२८ बस्ने भनिएको संस्थापक नेताहरु सहित संघ र प्रदेश सांसदहरुको बैठक अब वैशाख १३–१५ मा बस्ने भएको छ ।