भारतीय प्रधानमन्त्री नरेन्द्र मोदीले भारतले विगत नौ वर्षमा बुद्धका शिक्षाहरू पछ्याउँदै ठूलो प्रगति गरेको बताएका छन्। नयाँ दिल्लीमा आयोजित ग्लोबल बुद्धिस्ट समिटमा उनले भारतले सिद्धान्त, अभ्यास र यथार्थको मार्गसहित बुद्धका शिक्षाहरू अनुसरण गरेको बताए। भारत ती तीनै अंकमा द्रूत गतिमा अगाडि बढेको उनको भनाइ छ।

स्वतन्त्रताको ७५ वर्ष पूरा गरेको बेला भारतले ‘अमृत महोत्सव’ मनाइरहेका बेला विश्व बौद्ध शिखर सम्मेलनको आयोजना गरिएको हो।
‘अमृत कालमा भारत विकसित देश बन्ने दिशामा अगाडि बढिरहेको छ। भारतले भारतमात्र होइन, सम्पूर्ण विश्वको कल्याणको लागि संकल्प गरेको छ,’ मोदीले भने।

उनले थपे, ‘विजय, पराजय, लडाइँ, युद्धको अनुभूतिलाई त्याग्यौं भने मात्र हामी सुखलाई अँगाल्न सक्छौं। भगवान बुद्धले यिनीहरूलाई जित्ने मार्ग सिकाउनुभएको छ। शत्रुता शत्रुताले हराउन सक्दैन, तर प्रेमले सक्छ। वास्तविक सुख शान्तिसँग मिलेर बस्दा हुन्छ।’

उनले संसारलाई सुखी बनाउन आत्म, संसार र संकीर्ण सोच त्यागेर बुद्धको यो समावेशी मन्त्र मात्रै अपनाउनुपर्ने बताए।

प्रधानमन्त्रीले आफ्नो सम्बोधनमा रुस-युक्रेन युद्धको पनि उल्लेख गरे। ‘बुद्धको मार्ग भविष्यको मार्ग हो, दीगोपनको मार्ग हो। यदि विश्वले बुद्धको उपदेशलाई पालना गरेको भए जलवायु परिवर्तनजस्तो संकट पनि हाम्रो अगाडि आउने थिएन। यो संकट यसकारण आएको हो कि, पछिल्लो शताब्दीमा, केही देशहरूले अरूको बारेमा, भावी पुस्ताको बारेमा सोचेनन्,’ उनले भने।

विश्वका विभिन्न देशमा शान्ति अभियान होस् वा टर्कीमा भूकम्पजस्तो विपद् भारत हरेक संकटको घडीमा मानवताको साथमा ‘मम भव’ लिएर आफ्नो पूर्ण क्षमता लगाएर उभिएको उनको भनाइ छ।
-(एएनआई)