पछिल्लो समय नेपालमा आपराधिक गतिविधिमा संलग्न चिनियाँ नागरिकहरू ह्वातै बढेका छन्। अवैधरूपमा नेपालमा बसेर उनीहरू विभिन्नखाले आपराधिक गतिविधिमा संलग्न हुँदै आएका छन्। केही समयअघि नेपाली बालिकालाई विभिन्न प्रलोभनमा पारेर मानव तस्करी गर्न खोज्ने तीन जना चिनियाँ नागरिक पक्राउ परेका थिए।

१६ वर्षीया बालिकालाई चिनियाँ नागरिकसँग विवाह गराउने खोज्ने चिनियाँ नागरिकसहित ८ जनालाई प्रहरीले सुनसरीबाट पक्राउ गरेको थियो। धनकुटाको छथर जोरपाटी-२ की १६ वर्षीया बालिकालाई चीनको हुबेल निवासी ३३ वर्षका लि टेङसँग विवाह गराउँदै गर्दा प्रहरीले उनीहरूलाई पक्राउ गरेको थियो। उनीहरू सबै मिलेर चतरास्थित औलिया बाबाको मन्दिरमा विवाहको कार्यक्रम राखेका थिए।

प्रहरीले बेहुलासमेत रहेका चिनियाँ नागरिक लि, डोङ शिहाओ र वु हेजीलाई पक्राउ गरेको थियो। त्यस्तै किशोरीका बाबु, उदयपुर बेलकाका दीपक दर्जी, बद्रीबिक्रम राई, स्याङ्जा पुतलीबजारका शितल गुरुङ, काभ्रेपलान्चोक रोशीकी रोशनीमाया तामाङलाई पनि प्रहरीले पक्राउ गरेको थियो। सुनसरीका प्रहरी उपरीक्षक सुमन तिम्सिनाले बालिकाको इच्छा विपरीत प्रलोभनमा पारेर विवाह गरेको पाइएपछि उनीहरूलाई पक्राउ गरेको बताएका थिए।