नेपाल-चीन सिमाना नजिक रहेको ताप्लेजुङको पाथीभरा क्षेत्रमा केवलकार बनाउने विषयले चर्को विवादको रूप लिएको छ। पाथीभरा मन्दिरमा जाने केवलकार निर्माण गरिनु हुन्न भनेर लामो समयदेखि पहिचान पक्षधरहरू आन्दोलन गर्दै आएका छन्।

गत कात्तिक २३ गते केबलकार निर्माण कार्यको जडानको विरोधमा माओवादीको एक समूहले प्रदर्शन गरेको थियो। मुख्यतः नेकपा (माओवादी) का प्रदर्शनकारीहरूले प्रधानमन्त्रीसमेत रहेका नेकपा एमाले अध्यक्ष केपी शर्मा ओलीविरुद्ध नाराबाजी गरेका थिए। ताप्लेजुङ जिल्लाका साथै स्थानीय मेयरले निर्माणको शिलान्यास समारोहमा रोक लगाए पनि जबर्जस्ती गरिएपछि झडपसमेत भएको थियो। झडपमा ६ जना घाइते भएका थिए।

पाथीभरामा जानका लागि केवलकार निर्माण गर्न नहुने उनीहरूको अडान छ। मुकुम्लुङ्ग मुन्धुमी संस्कृतिको आस्थाको केन्द्र भएकाले स्थानीयहरूले त्यहाँ केबल कार निर्माणको विपक्षमा उभिँदै आएका छन्। किराँत याक्थुङ्ग चुम्लुङका महासचिव समेत रहेकी निरन्ती तुम्वापो भनिन्, ‘मुक्कुमलुङ्ग मुन्धुमी स्रस्कृतिको आस्थाको पवित्र स्थल भएकाले यहाँको वातावरण र प्रतिकुल हुने गरी निर्माण गरिनु हुन्न भन्ने हाम्रो कुरा हो।’ उनले पुर्खाहरूले बनाएर राखेको सामूहिक भूमिलाई सानातिना लोभ, लालचमा फस्दै पद, कुर्सीसँग साट्नेहरू सत्ता र शक्तिको मतियार रहेको बताइन्।

उनले पवित्र स्थललाई प्रभावित पार्ने गरी ठूला विकासका योजना ल्याउन नहुने बताइन्। निजी कम्पनीलाई पोस्ने गरी सरकारले संरक्षण गरेर योजना अगाडि बढाएकाले आन्दोलनमा उत्रनु परेको तुम्वापोले बताइन्। पाथीभरा देवी मन्दिर जानका लागि केवल कार निर्माण गर्ने निर्णय भएसँगै चार वर्षदेखि सो क्षेत्रमा आन्दोलन हुँदै आएको छ। सो क्षेत्रमा केवलकार निर्माण गर्न नहुने भन्दै पटक पटक पहिचान पक्षधरहरूले ज्ञापन पत्र बुझाउँदै आएका छन्।

पाथीभरा दर्शन केवलकार प्रा.लीले पाथीभरामा जाने केवलकार निर्माण गर्ने अनुमति पाएको छ। सो कम्पनीलाई सरकारले केवल कार निर्माणका लागि ४.९७ हेक्टर जमिन दिने निर्णय गरेको छ। केबलकार कम्पनी नेपालका प्रमुख व्यापारी तथा नेपाल उद्योग वाणिज्य महासंघ (एफएनसीसीआई) का अध्यक्ष चन्द्रप्रसाद ढकालको स्वामित्वमा रहेको छ। ढकाल झापा जिल्लाका हुन्। ढकाल प्रधानमन्त्री ओलीसँग नजिक छन्। ओली भने चीनसँग नजिक मानिन्छन्।