रुपन्देहीको भैरहवामा जारी थारू कल्याणकारिणीको २३‍औं महाधिवेशनको दोस्रो दिन बन्दसत्र आयोजना गरिएको छ। बन्दसत्रमा सहभागी प्रतिनिधिहरूले पदाधिकारीको चर्को आलोचना गरेका छन्। वर्तमान कार्यसमितिले ६ वर्षसम्म नेतृत्व गर्दासमेत थारूको माग मुद्दा र पहिचानका सबालमा कुनै काम गर्न नसकेको आरोप लगाएका छन्। आइतबार अबेर रातिसम्म बन्दसत्र जारी रहेकाले नेतृत्व चयनका विषयले सोमबारमात्र प्रवेश गर्ने बताइएको छ।

थाकसको सभापतिमा कार्यवाहक अध्यक्ष देवी चौधरी, महामन्त्री प्रेमीलाल चौधरी र उपमहामन्त्री मिनराज चौधरी मुख्य आकांक्षी रहेका छन्। उनीहरूमध्ये प्रेमीलाल र मिनराजले सार्वजनिकरूपमै उम्मेदवारी घोषणा गरेका छन्। लुम्बिनी प्रदेशका सांसदसमेत रहेका देवीले भने हालसम्म सार्वजनिकरूपमा उम्मेदवारी घोषणा गरेका छैनन्। धनिराम चौधरीले आफूलाई निरन्तरता नदिने हो भने देवीलाई सभापति बनाउनुपर्ने अडान लिएको स्रोतले बतायो।

यता कांग्रेसका शीर्ष थारू नेताहरूले प्रेमीलाललाई सभापतिमा सर्वसम्मत बनाउन दबाब दिएका छन्। थाकसमा कांग्रेसको दबदबा रहँदै आएको छ। नेतृत्व चयनकै लागि कांग्रेसका नरेन्द्र चौधरी, विजय कुमार गच्छदार, उमकान्त चौधरी, डिल्ली चौधरी, योगेन्द्र चौधरी, डा. गोपाल दहितलगायत नेताहरू भैरहवा पुगेका छन्। केहीबाहेक अधिकांश कांग्रेस नेताहरूले प्रेमीलालाई अध्यक्ष बनाउन दबाब दिएको स्रोतको भनाइ छ। धनिराम भूमिगत रहँदा सम्पूर्ण जिम्मेवारी प्रेमीलालले निर्वाह गरेको र थाकसमा उनको योगदान पनि पुरानो रहेको कांग्रेस नेताहरूको भनाइ छ। केही नेताहरू भने मिनराजको पक्षमा वकालत गरिरहेका छन्। बहालवाला सांसद भएकाले देवीलाई सभापतिको उम्मेदवारी नदिन नेताहरूले सुझाव दिएको स्रोतको दाबी छ।

सभापतिका लागि पार्षद/प्रतिनिधिहरू पनि तीन खेमामा बाँडिएका छन्। काठमाडौंसहित पूर्वका अधिकांश प्रतिनिधिहरू प्रेमीलालको पक्षमा उभिएका छन् भने रुपन्देही र आसपासका प्रतिनिधिहरू देवीलालको पक्षमा उभिएका छन्। पश्चिमका अधिकांश प्रतिनिधिहरू भने मिनराजको पक्षमा वकालत गरिरहेका छन्। थाकसमा युवा नेतृत्वको माग र थरुहट आन्दोलनको पिल्लरसमेत भएकाले मिनराजलाई सभापति बनाउनुपर्ने उनीहरूको माग छ। तर, शीर्ष नेतृत्वले थाकसमा गरेको योगदान र समग्र कामको अनुभवको आधारमा प्रेमीलालई सभापति बनाउनुपर्ने दबाब दिइएको स्रोतको भनाइ छ।

पश्चिम खेमाले मान्ने हो भने प्रेमीलाल चौधरी सर्वसम्मत सभापति बन्नसक्छन्। प्रेमीलाल सभापति बन्दा मिनराज चौधरीलाई भने महामन्त्री सर्वसम्मत बनाउन सकिने नेताहरूले निष्कर्ष निकालेका छन्। यद्यपि, कांग्रेसकै अन्य पदाधिकारीहरू पनि महामन्त्रीको आकांक्षी रहेका छन्। ‘मिनराजजी मान्ने हो भने महामन्त्री पनि सर्वसम्मत गराउन सकिन्छ। हामीले सर्वसहमतिबाटै नेतृत्व चुन्न सुझाव दिइरहेका छौं,’ कांग्रेसका एक शीर्ष थारू नेताले थारूवानसँग भने।