जिल्ला समन्वय समिति कैलाली प्रमुखको लागि सत्तारुढ दल नेपाली कांग्रेस र नागरिक उन्मुक्तिबिच प्रतिस्पर्धा हुने भएको छ । ती दुवै दलका उम्मेदवारले आइतबार निर्वाचन अधिकृतको कार्यालयमा उम्मेदवारी दर्ता गराएका हुन् ।

कैलालीमा दोस्रो ठुलो दल रहेको नाउपाको तर्फबाट रुपमती डंगौरा थारुले जिसस प्रमुखको लागि उम्मेदवारी दिएकी छिन् । टीकापुर नगरपालिका वडा नम्बर ४ की वडा सदस्य रहेकी थारुको प्रस्तावक जोशीपुर गाउँपालिकाकी उपाध्यक्ष रेखादेवी कठरिया रहेकी छन् भने जोशीपुरकी उपाध्यक्ष राजु तिरुवाले समर्थन गरेकी छिन् ।

समन्वय प्रमुखको उम्मेदवारी दर्ता गराउन नाउपाका प्रदेश सभा सदस्य कैलाश चौधरीसहित टीकापुर र भजनी नगरपालिकाका नगर प्रमुखको उपस्थितिमा थारूले उम्मेदवारी दर्ता गराएकी हुन् । यहाँ नाउपासँग ७ मतभार रहेको छ । त्यस्तै, कैलालीमा सबैभन्दा ठुलो दल रहेको कांग्रेसबाट टीकाकुमारी चौधरी भुलले जिसस प्रमुखको लागि उम्मेदवारी दर्ता गराएकी छिन् ।

भुल कैलारी गाउँपालिका वडा नम्बर २ को महिला वडा सदस्य हुन् । उनको उम्मेदवारीको प्रस्ताव कैलारी गाउँपालिकाका अध्यक्ष रामसमझ चौधरी तथा समर्थकमा धनगढीकी उपप्रमुख कन्दकलाकुमारी राना रहेकी छन् । यहाँका जिसस प्रमुख पदम कलेलको २०७९ पुस २३ मा निधन भएपछि प्रमुखको पद रिक्त छ । यहाँ कुल २६ मतभार रहेको छ ।

जिसस कैलालीमा नाउपाको भजनी नगरपालिकामा प्रमुख र उपप्रमुख, जानकी र जोशीपुर गाउँपालिकामा अध्यक्ष र उपाध्यक्ष तथा टीकापुरमा नगर प्रमुख छन् । नाउपाले नेकपा माओवादी केन्द्र र समाजवादीको समर्थन पाए २५ मध्ये ११ मत पाउने सम्भावना छ । माओवादीबाट टीकापुरको उपप्रमुख निर्वाचित भएका खडकबहादुर शाह अहिले निलम्बित छन् ।

अर्कोतिर सत्ता गठबन्धनसँग कूल २५ मध्ये १३ मत रहेको छ । टीकाकुमारीको पक्षमा कांग्रेससँग ८ र एमालेसँग ५ मत छ । एमालेबाट चुरे गाउँपालिकाका अध्यक्ष, गोदावरी नगरपालिकाका उपप्रमुख, बर्दगोरिया गाउँपालिकाका अध्यक्ष, लम्कीचुहाका उपप्रमुख र धनगढीका उपप्रमुखको मत सत्ता गठबन्धन उम्मेदवारको पक्षमा हुनेछ । कांग्रेसबाट मोहन्यालका उपाध्यक्ष, लम्कीचुहाका नगर प्रमुख, चुरेका उपाध्यक्ष, घोडाघोडीका उपप्रमुख, गौरीगङ्गाका उपप्रमुख, गोदावरीका प्रमुख तथा कैलारी गाउँपालिकाका अध्यक्ष र उपाध्यक्षको मत छ ।