थारू कल्याणकारिणी सभाको २३औं महाधिवेशनको उद्‍घाटन गरिएको छ। उपप्रधान एवं अर्थमन्त्री विष्णु पौडेलले महाधिवेशनको उद्‍घाटन गरेका हुन्। देशभरिका थारू प्रतिनिधिहरू सहभागी भएको महाधिवेशनमा अर्थमन्त्री पौडेलले थारूका माग मुद्दा सम्बोधनमा सरकार प्रतिवद्ध रहेको बताए।

महाधिवेशनको उद्‍घाटन सत्रमा थाकसका सभापति धनिराम चौधरी अनुपस्थित रहे। टीकापुर घटनामा मुख्य आरोपीका रूपमा प्रहरीले ‘मस्ट वान्टेड’को सूचीमा राखेपछि उनी सार्वजनिकरूपमा उपस्थित नभएका हुन्। यद्यपि उनी बन्दसत्रमा सहभागी बन्ने स्रोतले बताएको छ।

उनले उद्‍घाटन सत्रमा शुभकामना सन्देश पठाएका थिए। सीमानामा पिल्लरजस्तो उभिने थारुलाई राज्यले अपराधी बनाएको उनको सन्देशमा उल्लेख छ। उमहामन्त्री मिनराज चौधरीले उनको शुभकामना सन्देशवाचन गरे, ‘हामी मलेरियाबाट लड्यौं। समतल तराईलाई खेतीयोग्य बनायौं। नश्लवादीले हामीलाई मधेसी बनाए। मुक्तिका लागि हामीले थरुहट थारुवान आन्दोलन गर्‍यौं। थरुहट थारुवान प्रदेश माग्यौं। हाम्रो मागलाई राज्यले सम्बोधन गर्नुपर्छ भन्यौं। न्याय र अधिकारका लागि लड्दैगर्दा टीकापुर घटना घट्न गयो। सीमानामा पिल्लरजस्तो उभिएर लड्ने थारुलाई राज्यले अपराधी बनायो। थारुलाई भोट बैंकको रूपमा मात्र प्रयोग गर्ने कि उनीहरूको माग सम्बोधन पनि गर्ने। उनीहरूलाई न्याय पनि दिने। उनीहरूको छुट्टै प्रदेश पनि दिने।’

अर्थमन्त्री पौडेलले पनि धनिराम चौधरीको उपस्थिति खट्किएको बताएका थिए। उनको अनुपस्थितिले आफूलाई पीडा भएको उनको भनाइ छ।