शत्रुघन चौधरी
आजकल गाँउ गाँउमे हरेरी पुजा हुईटीबा । कहुँ पुजा सम्पन्न हुराखल, कहुँ बाँकी बा । हरेरि पुजा थारू समुदायमे कैजैना पुजा मध्य एक महत्वपुर्ण पुजा हो ।

हरेरि पुजाहे सबसे बर्का पुजाके रूपमे फे लेजाईठ । खासकैके खेतिपाति सेकके भाडोमे यि पुजा गाउँभरके मनै मिलके सामुहिक रूपमे पुजा कैजाइठ । वालिनालि मजा होय । गाँउमे खाँज खुजलि नालागे हैवि दैवी नालागे पशु चौपायाके रक्षा होय, घर गाउमे अनाज भरपुर होय कना विश्वासके साथ यि पुजा कैजाईठ । हरेरि पुजामे गुरूवा अनिवार्य चाहठ ।

देशबन्ढिया केसौका घरगुरूवा लगायत गुरूवनके महत्वपुर्ण भुमिका रहठ । गुरूवा ज्ञान एक अदभुत ओ अलैाकिक ज्ञान हो । जोन गुरूवालोग साधना, दिव्य वाँणि ओ गुरूमन्त्रसे पैलेरठाँ । गुरूवक संख्या दिन प्रति दिन घटटी जाईटा । एक अध्धययन फे डेखासेकल आवक ३० वरष परसे थारू समुदायमे गुरूवा लोप हुईना खतरा बा ।

गुरूवक अस्तित्व संकट पर्ना कलक थारूनके परम्परागत पुजा संकटमे पर्नाहो । यिहिसे फे कहे सेकजाईठ हरेरि पुजा फे संकटमे परटा ।लावा गुरूवा कोन गाउक हरेरिमे कैठो निकरलाँ कना समाचार कबुनै पढे सुने मिलठ । यदि कोई कबुकाल गुरूवा निकरि कलसे फे यी समाचार नैबनठ । यि दुखके बाट हो । लावा गुरूवा नै निकरना सेफे अनुसन्धानके निष्कर्ष मेल खाईठ ।

यकर वारेमे कहुँ चिन्तन मनन विमर्श कैल नै विल्गठ । गाउघरमेयकर वारेम बहल चलैना अभिन ढिला नै हुईलहो । आब हरेक हरेरि पुजामे यि छलफल चलैना जरूरि विल्गठ । पुरान गुरूवनके ज्ञान पुस्तान्तरण कसिक कर सेकजाईठ? बाट उठान करि । गोटगाट स्थानिय सरकार सिमिट बजेट पुजा खर्च कैहके डेलक समाचार फे आईलबा यि फोहिक विषय हो ।

लेकिन आब सेँन्डुर टिका चिङ्नि आदि पुजा खर्च कील नाहि यिहि दिगो बनाईकलग धेर बजेट आवश्यक विल्गठ । गुरूवनहे प्रोत्साहन भत्ता चाहल । लावा गुरूवा निकरलेसे लाखो रूपियक पुरस्कार रासि ढारे परल । अस्टके गुरूवनके टनखा लगायत विविध सुविधा टोके परल । गुरूवनके विमा कर परल । समय समयमे या माघमे गाउक गुरूवनहे सम्मान कर परल ।

गुरूवनके क्षमता विकास कर परल, ओषधि उपचारके व्यवस्था हुईपरल, यकरलग स्थानिय सरकारसे बजेट माग करपर्ना जरूरि बा । वहाँ लोगके ज्ञानके कदर जवटक नै हुई टबटक लावा गुरूवा बन्ना कोई आगे नै परि । यदि पुरान परम्परा संस्कृति वचैना बा टे यहोर फे आजुसे सोचि जागि उठि ओ लागि । जय अखरिया!