सम्पूर्णमा हार्दिक नमस्कार !
म जयप्रकाश चौधरी । नेपालको दाङ जिल्लाको राप्ती गाउँपालिका-५, सिसनियानिवासी । विगत चार बर्ष देखि म अमेरिकाको ओक्लोहामा राज्यमा श्रीमती र छोराछोरीसँग बस्दै आएको छु । नेपालको दुर्गम क्षेत्रमा बस्दै आएको मजस्तो व्यक्तिलाई अमेरिका आउने मौका मिल्यो र छोराछोरीको भविष्य मेरोभन्दा अलि राम्रो होला भन्ने आशमा दुःख-सुख जीवन गुजारा गर्दै समय बिताउँदै थियौं । यो बीचमा बुढेसकाल सामना गरिरहनुभएका मेरा बुबा-आमाको एक पटक अमेरिका हेर्ने इच्छालाई जसरी भए पनि पूरा गर्नुपर्छ भनेर उहाँहरूलाई २ महिना अघि अमेरिका बोलाएको थिएँ । बुबा-आमाको बुढेसकाल, प्रतिकूल स्वास्थ्य त छँदै थियो त्यसमा पनि खर्चअभावका कारण समयमै नेपाल पठाउन सकिरहेको थिइनँ । नियमितभन्दा अलि बढी समय काम गरेर आफ्नो दैनिक खर्चलाई कटौती गर्दै थोरै पैसा बचाएर जसरी भए पनि बुबा-आमालाई नेपाल पठाउनका लागि टेक्सासको डालसबाट अगस्ट १५, २०२३ का लागि टिकट काटेको हुँदा ओक्लोहामाबाट प्लेनमा टेक्सासको डीएफडब्लू एयरपोर्टमा आई त्यहाँबाट नेपाल पठाउने सिलसिलामा कतार एयरलाइन्सको प्लेनमा चढ्न लाग्दा मेरी आमा फिरिया चौधरी (७५) लाई अकस्मात् हृदयघात हुन पुग्यो । त्यसपछि उहाँलाई बेडफोर्डको एच.ई.बी. हस्पिटलको इमर्जेन्सी सेवा पुर्याइयो तर ठीक हुनुको सट्टा मेरो आमाले हस्पिटलमा सदाका लागि प्राण त्याग्नुभयो ।

मलाई जन्म दिने आमालाई गुमाउनुपर्दाको पीडा त ममा छँदै छ त्यसमा पनि मेरो आमाको स्वास्थ्य बिमा नभएको साथै आमाको अन्तिम संस्कार पनि अमेरिकामा नै गर्नुपर्ने, मेरो ७७ बर्षीय बुबालाई पुनः टिकट काटेर नेपाल पठाउनुपर्ने मेरो बाध्यता रहेको तर मेरो आर्थिक अवस्था राम्रो नभएकाले सो खर्च जुटाउन म मसँग कुनै विकल्प नभएकाले यहाँहरूसमक्ष सानो सहयोगका लागि हार्दिक अपिल गर्दछु । मेरो जीवनमा अकस्मात् आइपरेको बज्रपात यहाँहरूसमक्ष बाध्य भएर सुनाउनुपर्दा मलाई अत्यन्तै असहज महसुस भएको छ । तर पनि यसो गर्नु मेरो बाध्यता भनेर यहाँहरूले बुझिदिनुहुनेछ र सानो आर्थिक सहयोग गरिदिनुहुनेछ भन्ने मैले पूर्ण आशा लिएको छु । नमस्कार ।

गोफन्डमीमार्फत् यहाँ क्लिक गरेर सहयोग गर्न सक्नुहुन्छ।