मधेसी आयोगले थारू आयोगका पदाधिकरीहरूकै सहमतिमा थारूलाई मधेसीमा सूचीकृत गरेको बताएको छ। गत मंसिर २९ गते प्रेस विज्ञप्ति जारी गर्दै मधेसी आयोगले यस्तो दाबी गरेको हो।

‘मधेसी आयोगले आफ्नो थर सूचीकरण अध्ययन प्रतिवेदनमा थारू र मुस्लिमलाई थारू आयोग र मुस्लिम आयोगकै पदाधिकारीहरूको सहमतिमा मधेसीको रूपमा सूचीकृत गरी अग्रसारित गरेको थियो,’ उपसचिव सविता डंगोलद्वारा जारी विज्ञप्तिमा भनिएको छ।

थारू र मुस्लिम समुदायबाट व्यापक विरोध भएपछि उक्त प्रतिवेदनमा उल्लेखित सूचीकरण मधेसी आयोगले मंसिर २० गते हटाउने नर्णय गरेको थियो।

तर आयोगले थारू आयोगका पदाधिकारीहरूले दोहोरो चरित्र देखाएको आरोप गाएको छ। मधेसी आयोगले आफूहरूलाई भन्दा पनि थारू आयोगकै पदाधिकारीहरूसँग यसबारे प्रश्न गर्न आग्रह गरेको छ।