काठमाडौं।

कैलाली जिल्ला अदालतले टीकापुर घटनामा पक्राउ परेका राजपा सांसद रेशम चौधरी, राजपा नेता लक्ष्मण थारुसहित ५८ जनालाई अदालतमा उपस्थित हुन पत्र काटेको छ । अदालतले फागुन १५ गते पेसी तोक्दै टीकापुर घटनामा अभियुक्त बनाइ विभिन्न करागारमा राखिएका आरोपीहरुलाई उपस्थित हुन पत्र काटेको हो ।

आरोपित ५८ जनामध्ये २३ जना कैलाली जिल्ला कारागार, लक्ष्मण थारुलाई केन्द्रीय कारागार, रेशम चौधरीलाई सदर जेल र करण र श्रवण चौधरीलाई पोखरास्थित बाल सुधारगृहमा राखिएको छ ।
२०७२ भदौ ७ गते घटेको घटनामा एक बालक र ७ जना प्रहरीको ज्यान गएको थियो ।

सो सम्बन्धमा केन्द्रीय कारागारमा रहेका लक्ष्मण थारुले जिल्ला कारागार कैलाली पठाउन निवेदन दिएपनि त्यसोको सुनुवाइ भएको छैन । लक्ष्मण थारुका अनुसार केन्द्रीय कारागारले पठाउन अनुमति दिएपनि कैलालीका प्रमुख जिल्ला अधिकारी र कैलालीका जेलरले आफूलाई कैलाली नपठाउन दबाब दिएका छन् । लक्ष्मण थारुलाई कैलाली ल्याउँदा शान्ति सुरक्षा खल्बलिने भन्दै जेलरले लक्ष्मण थारुलाई नपठाउन दबाब दिएको बताइएको छ ।

‘यतिका दिन कैलाली कारागारमा रहँदा कुनै समस्या भएन । अब म जाँदा शान्ति सुरक्षा खल्बिलिन्छ रे,’ लक्ष्मणले सुनाए । उनले आफूहरुलाई जेलमै कोचिरहन प्रपञ्च रचिएको बताए ।

यता वकिल खर्च नपुगेर थारु कल्याणकारिणी सभा कैलालीले सहयोगको अपिल गरेको छ । टीकापुर घटना सम्बन्धको मुद्दामा धेरै खर्च भइसकेको अहिले रकम अभाव भइरहेकाले विभिन्न व्यक्ति संस्थासँग रकम जुटाइदिन पहल गरेको थाकस कैलालीका सभापति माधव थारुले जानकारी दिए । उनले देश तथा विदेशमा बस्नुहुने थारुहरुलाई सहयोग गरिदिन अपिल गरेका छन् ।