थारु नेता राजकुमार लेखीले थारु कल्याणकारिणी सभा (थाकस)बाट विश्राम लिने भएका छन्। नागरिक समाजवादी पार्टीको संयोजक लेखीले पार्टीको काममा बढी सक्रिय हुने भन्दै सभाबाट विश्राम लिने बताएका छन्। ‘हुन त विगत ११ महिनादेखि थाकसमा निस्क्रिय छु। अब औपचारिकरुपमै सभाबाट विश्राम लिँदैछु,’ उनले भने।

शनिबार थाकस उपत्यका समितिको अधिवेशनमा विश्रामको घोषणा गर्ने बताइएको छ।

उनले थाकसमा उपत्यका समिति र केन्द्रीय कमिटी गरेर १८ वर्ष योगदान गरेका छन्। उपत्यका समितिमा ९ र केन्द्रीय कमिटीमा पनि उनले ९ वर्ष योगदान गरेका छन्। अष्टभुजा अध्यक्ष हुँदा लेखीले महामन्त्री पद सम्हालेका थिए।

अहिले उनी थाकसमा केन्द्रीय सदस्य, सचिवालय सदस्य र प्रशिक्षण विभाग प्रमुख छन्। थाकसमा सक्रिय नरहेपनि यो कार्यकालमा आफूलाई दिइएको जिम्मेवारी भने निर्वाह गर्ने उनले बताए। ‘म पूर्णरुपमा निस्क्रिय रहेपनि मलाई दिइएको जिम्मेवारी भने निर्वाह गर्नेछु,’ उनले भने।