थारु युवाहरुको सक्रियतामा यस वर्ष खुलामञ्चमा माघी महोत्सव मनाइयो। यसअघि थारु कल्याणकारिणी सभा उपत्याका समितिको संयोजनमा माघी महोत्सव मनाइए पनि प्रमुख अतिथि र पारदर्शिताको सबालमा युवाहरुसँग कुरा नमिल्दा दुई ठाउँमा महोत्सव आयोजना भएको थियो। थारु विद्यार्थी नेता चन्द्रप्रसाद चौधरीको संयोजकत्वमा खुलामञ्चमा महोत्सव आयोना भयो। महोत्सव करिब २५ हजार दर्शकले अवलोकन गरेको आयोजकले दाबी गरेको छ।

थारुको नयाँ वर्ष माघ १ गते राजधानीबासी थारुले महोत्सवको रुपमा मनाउँदै आएको छ। गत शुक्रबार युवाहरुले भृकुटिमण्डपबाट झाकी र्‍याली निकाले थिए। थारु पहरिनमै युवाहरु झाकीमा सहभागी थिए। टुडिखेल हुँदै खुलामञ्च आइपुग्दा कलाकारहरुले थारु संस्कृति झल्काउने नृत्यसमेत प्रस्तुत गरेका थिए।

कार्यक्रमको उद्‍घाटन पूर्वप्रधानमन्त्री एवं नयाँ शक्तिका अभियन्ता बाबुराम भट्टराईले गरेका थिए। संयोजक चन्द्रप्रसाद चौधरीकै सभापतित्वमा भएको उद्‍घाटन समारोहमा मधेसी नेताहरु हृदयश त्रिपाठी, लक्ष्मणलाल कर्ण पनि सहभागी थिए। कार्यक्रममा पहिचानका लागि लड्दै आएका जनजाति नेताहरु पनि उपस्थित थिए।

त्यस्तै थारु सांसदहरु तेजुलाल चौधरी, गंगा थारु पनि समारोहमा सहभागी थिए। त्यस्तै अधिकारकर्मी विजयकान्त कर्ण र सुरेन्द्र चौधरी पनि समारोहमा उपस्थित भए।

थरुहट थारुवान संयुक्त संघर्ष समितिबाट शैलेन्द्र चौधरी र रमेश चौधरी पनि उपस्थित थिए। उपस्थित सबै नेताहरुले पहिचान र अधिकारको लडाइँबाट पछि हट्न नहुने जिकिर गरेका थिए। सहभागी नेताहरुले थारु आन्दोलनलाई सफल बनाउन र त्यसभित्रका खराब तत्वहरुलाई हटाउन युवाहरु सक्रियरुपमा आउनुपर्ने बताए। थरुहट तराई पार्टी नेपालका सचिव मीनराज चौधरीले कार्यक्रम सञ्चालन गरेका थिए।

महोत्सवमा चम्पन संस्कृतिक समूहको बेजोड प्रस्तुती रहेको थियो। सो समूहले थारुहरुको प्रख्यात थारु लाठी नृत्य प्रस्तुत गरेका थिए। साँस्कृतिक कार्यक्रमको सञ्चालन दोषहरण चौधरीले गरेका थिए।

भिडियो हेर्नुस्: