संविधानको पहिलो मस्यौदाको प्रचारप्रसार एवम् जनताबाट राय सुझाव सङ्कलनका लागि आजदेखि सभासद्हरुलाई ७५ जिल्लाका २४० निर्वाचन क्षेत्रमा पठाइने भएको छ। मस्यौदाको वितरण र प्रचारप्रसारबारे जानकारी गराउन नागरिक सम्बन्ध तथा संविधान सुझाव समितिले आज यहाँ आयोजना गरेको पत्रकार भेटघाटमा समितिका सभापति प्रमिला राणाले सभासद् जिल्ला र क्षेत्रमा पुगेपछि प्रचारप्रसार र सुझाव सङ्कलनकार्यले थप उचाइ लिने बताए। 

‘समितिले तयार गरेको संविधानको विधेयकको पहिलो मस्यौदा प्रचारप्रसार र सो बारे नेपाली नागरिकको सुझाव सङ्कलन कार्ययोजना, २०७२ असार २४ गतेदेखि कार्यान्वयनमा आएसँगै प्रचारप्रसार र सुझाव सङ्कलनकार्यले तीव्रता पाएको छ,’ उनले भने।

समितिअन्तर्गत गठन भएका आन्तरिक कार्यविधि तथा कार्ययोजना, विदेशमा बसोवास गरेका नेपाली नागरिकको सुझाव सङ्कलन, प्रचारप्रसार तथा प्रकाशन, समन्वय तथा अनुगमन र प्रतिवेदन मस्यौदा गरी पाँच उपसमितिले आ–आफ्नो जिम्मेवारी अनुसारको काम गरिरहेको उनले जानकारी गराए।

असार २५ गतेदेखि प्रत्येक जिल्लामा दुइदुई जना सचिवालयका कर्मचारीले सम्पूर्ण निर्वाचन क्षेत्रमा मस्यौदा वितरण र प्रचारप्रसारको काममा समन्वय गरिरहेका छन्।

सभासद् राजिवविक्रम शाहीका अनुसार संविधानको मस्यौदामा स्वदेश र विदेशमा बसोवास गरेका नेपाली नागरिकको राय सुझाव प्राप्त भइरहेका छन्।

आजसम्म एक हजार ५० टोल फ्रि नम्बरबाट, वेभसाइटमार्फत एक हजार ५००, इमेलबाट एक हजार ११०, फ्याक्सबाट २८ वटा र हुलाक तथा सोझै सचिवालयमा १६ वटा लिखित सुझाव प्राप्त भएका छन्।

सभासद् पे्रम गिरीले प्राप्त सुझावहरुमा अधिकांश नागरिकता, समावेशिता, सीमाङ्कनलगायतका विषयमा रहेको जानकारी गराए।

सभासद् प्रभादेवी वज्राचार्यले यही साउन ४ र ५ गते सञ्चालन हुने सुझाव सङ्कलनको सार्वजनिक राष्ट्रिय अभियानमा जनताको व्यापक सहभागिता रहने अपेक्षा गरिएको बताए।

केन्द्रीय तहमा सुझाव सङ्कलनको कार्यक्रमलाई अनुगमन र समन्वय गर्नका लागि संविधानसभाका महासचिवको नेतृत्वमा केन्द्रीय अनुगमन तथा समन्वय समिति रहेको छ।

उक्त समितिअन्तर्गत सचिवालयका सहसचिवहरुको नेतृत्वमा पाँच विकास क्षेत्र समेट्ने गरी अनुगमन टोली बनाइएको समितिले जनाएको छ। रासस