कौशलेन्द्रकुमार- गइल संविधान सभाके चुनावमे जम्मा १३ थारु प्रतिनिधि प्रत्यक्षमे जिटल रहिट। जेम्नेसे मधेशी जनअधिकार फोरमसे विजयकुमार गच्छदार सुनसरी ओ मोरङ २ ठाउँसे जिटलमे सुनसरी ३ मे अप्की एमालेक् भगवती चौधरी उठल ओर्से उहाँ कडा प्रतिस्पर्धा रहलमे सुनसरीमे भर जित पक्का बटिन्। गोविन्द चौधरी (रौतहट) तमलोपालासे चुनाव जिटलमे अप्की मधेशी जनअधिकार फोरम (लोकतान्त्रिक) से उठल बटाँ। पहिले स्वतन्त्र उम्मेद्वारके रुपमे फेन जित्ना हैसियत रख्लक उहाँहे दलबदलसे कौनो फरक नैपर्ना जित्ना पक्का बटिन।
ओस्टक बारा ५ मे सक्कु बरा दल थारु उम्मेद्वारन् उठैलकमे कांग्रेसके उमाकान्त चौधरी जित्ना सदाबहार प्रतिनिधि हुइट, अप्की फेन हुँखिन कोइ असर नैपर्ना बिल्गैठिन। बाँकी ९ जाने थारु कैलाली, कञ्चनपुर, बर्दिया, दाङसे जिटलमे अप्की बर्दियासे पुरान उम्मेद्वार बर्दिया ३ के सन्तराम थारु किल रहल ओर्से हुँकार जित्ना अवस्था बाहेक आउर एमाओवादीसे उठल उम्मेद्वार थारुन्के कोइ ग्यारेण्टी नैहो, कारण ड्यास माओवादी ओइन अप्ठ्यार पर्ले बटिन।
गइल निर्वाचनमे चितवनसे लालमणि चौधरी एमालेसे अक्केली जिटल रहिट। अप्की उहाँ समानुपातिकमे बटाँ। एमालेसे सब्से बल्गर थारु उम्मेद्वार कलक दाङ क्षेत्र नं १ के शान्ता चौधरी हुई, जे पूर्व सभासद फेन हुई, मने उहेंसे उठल कांगे्रसके महिला उम्मेद्वार सुशिला चौधरीके फेन पकड हुइल ओर्से अवस्था का हुइठस कहे नैसेक्जाई। ओस्टक बल्गर उम्मेद्वारमे कैलाली ३ के मधेशी जनअधिकार फोरम (लोकतान्त्रिक) के रामजनम चौधरी फेन हुइट। हुँकारे क्षेत्रसे उठल थरुहट तराई पार्टी नेपालके अध्यक्ष भानुराम चौधरी अपन क्षेत्रमे टे कमजोर बट्बे करिट, ऊ पार्टीसे कहुँ बल्गर उम्मेद्वार नैहुइट। असिके पहिले प्रत्यक्ष ओ समानुपातिक कैकै ३७ थारु प्रतिनिधि रहलमे अप्की नियोजन हुइना ढेर सम्भावना बिल्गठ।
साभारः १ मंसिर, गोरखापत्र